ایلیٹ فورم ریاض کی جانب سے 78 واں یومِ آزادی جوش و خروش سے منایا گیا

الریاض (حمزہ عباس) ایلیٹ فورم ریاض کی جانب سے  پاکستان کا 78 واں یومِ آزادی ملی جوش و خروش سے منایا۔  تقریب فورم کی بانی جویریہ اسد نے ریاض کی ٹیم ممبران زینت شہاب، رابعہ شہاب اور ڈاکٹر اقرا کے ہمراہ ترتیب دی۔ پاکستانی کمیونٹی کی خواتین اور بچوں نے بڑی تعداد میں شرکت کی

جویریہ اسد نے اپنے خطاب میں کہا: “ہم سعودی عرب میں پاکستان کے سفیر ہیں اور یہ ہماری قومی و اخلاقی ذمہ داری ہے کہ دنیا بھر میں پاکستان کا مثبت، شائستہ اور روشن تشخص اجاگر کریں۔ یہ تقریبات ہمیں یاد دلاتی ہیں کہ یہ پاک وطن ہمیں بے شمار قربانیوں، جدوجہد اور ایثار کے بعد نصیب ہوا ہے، اور اب اس کی ترقی و خوشحالی کو یقینی بنانا ہم سب کی اولین ذمہ داری ہے۔”

تقریب میں یومِ آزادی کی اہمیت کو اجاگر کرنے کے لیے مختلف دلچسپ سرگرمیاں منعقد کی گئیں۔ شرکاء نے اپنے بچپن کی دلآویز یادیں بیان کیں جب وہ یومِ آزادی منایا کرتے تھے، اور اس بات پر روشنی ڈالی کہ مائیں کس طرح اپنے بچوں کو اس دن کی حقیقی معنویت اور قومی فریضے سے روشناس کرا سکتی ہیں۔

اسماء مجید، ڈاکٹر اقرا، مس نبیہ اور دیگر شرکاء نے وطنِ عزیز کے لیے اپنی والہانہ محبت، خلوص اور تشکر کا اظہار کرتے ہوئے کہا کہ پاکستان ہماری شناخت اور افتخار ہے۔

تقریب میں “روپ آف ہوپ” سرگرمی تھی جس میں شرکاء نے پاکستان کے لیے اپنی نیک تمناؤں، دعاؤں اور امیدوں پر مبنی پیغامات تحریر کیے۔ یہ پیغامات مل کر ایک خوبصورت زنجیرِ اُمید کی صورت میں ڈھل گئے جو یکجہتی، امید اور تابناک مستقبل کی علامت بن گئے۔

تقریب کے اختتام پر تمام شرکاء کو زینت شہاب اور جویریہ اسد کی جانب سے تحائف پیش کیے گئے