پاکستان کے پہاڑی ضلع بالاکوٹ کے نوجوان کا اعزاز

پاکستان کے پہاڑی ضلع بالا کوٹ سے تعلق رکھنے والے نوجوان شہزایب شاہ نے عالمی سطح پر سائبر سیکیورٹی کے شعبے میں اپنی صلاحیتوں کا لوہا منوا لیا۔ ایک ایسے علاقے جہاں جدید ٹیکنالوجی تک رسائی محدود ہے، شہزایب نے صرف اپنے شوق اور محنت کی بنیاد پر وہ مقام حاصل کیا ہے جس پر دنیا کے بڑے بڑے ماہرین بھی رشک کرتے ہیں۔

بچپن سے ہی کمپیوٹر اور انٹرنیٹ میں دلچسپی رکھنے والے سید شہزایب شاہ نے خود سے سیکھنا شروع کیا۔ انہوں نے نہ صرف پاکستان بلکہ دنیا بھر کے حساس اداروں اور معروف ویب سائٹس میں سائبر خامیاں دریافت کیں، جنہیں بروقت رپورٹ کر کے ہزاروں لوگوں کی معلومات اور نظاموں کو ممکنہ خطرات سے بچایا۔

"جب کچھ سیکھنے کی لگن ہو، تو راستے خود بن جاتے ہیں۔ میں نے خود پر بھروسا کیا، اور آج دنیا مجھے ایک سائبر سیکیورٹی ماہر کے طور پر تسلیم کرتی ہے،”
— سید شہزایب شاہ

شہزایب شاہ نے نہ صرف ان خامیوں کی نشاندہی کی بلکہ ان اداروں کو تفصیلی رپورٹ فراہم کر کے یہ ثابت کیا کہ پاکستان کے نوجوان بھی عالمی معیار کے ماہرین میں شامل ہو سکتے ہیں۔ ان کا انداز، طریقہ کار، اور اخلاص ان کو دوسرے ماہرین سے ممتاز کرتا ہے۔

عالمی سطح پر شناخت
سید شہزایب شاہ کے کارنامے بین الاقوامی میڈیا اداروں جیسے اے پی نیوز، سائبر سیکیورٹی ڈائیو، بینزنگا، بیم اسٹارٹ، اور اے ڈی وی ایف این پر شائع ہو چکے ہیں۔ یہ اعزاز نہ صرف ان کے لیے بلکہ پاکستان کے لیے بھی باعث فخر ہے۔

ان کی خدمات کی بدولت دنیا بھر میں سائبر سیکیورٹی کے نظام بہتر ہوئے اور خطرناک حملوں سے بچاؤ ممکن ہو سکا۔

نوجوانوں کے لیے پیغام
سید شہزایب شاہ کی کہانی اُن تمام پاکستانی نوجوانوں کے لیے ایک روشن مثال ہے جو وسائل کی کمی کے باوجود کچھ بڑا کرنے کی خواہش رکھتے ہیں۔ انہوں نے یہ ثابت کر دیا کہ اگر ارادے مضبوط ہوں، تو پاکستان کا نوجوان دنیا میں اپنی شناخت خود بنا سکتا ہے۔