علی امین پارٹی کے احتجاجی اخراجات کی تفصیلات سامنے آگئیں۔

ذرائع کے مطابق وزیراعلیٰ خیبرپختونخوا علی امین گنڈاپور نے جلسوں اور احتجاجی مظاہروں پر 50 کروڑ روپے سے زیادہ خرچ کیے ہیں۔ ذرائع کا بتانا ہے کہ احتجاج کے دوران جلائی گئی مشینری اور دیگر نقصانات کی ادائیگی بھی وزیراعلیٰ نے اپنی جیب سے کی، تاکہ کسی قسم کا مالی بوجھ سرکاری خزانے پر نہ پڑے۔

مزید یہ بھی بتایا گیا ہے کہ کل ہونے والے جلسے کے لیے علی امین گنڈاپور نے پارٹی کو 50 لاکھ روپے فراہم کیے ہیں، تاکہ جلسے کے انتظامات بہتر انداز میں کیے جا سکیں۔ اس کے علاوہ احتجاجی قافلوں میں شامل سیکڑوں گاڑیوں کے کرایوں کی بھی ادائیگی کر دی گئی ہے، تاکہ کارکنان بغیر کسی پریشانی کے جلسے میں شرکت کر سکیں۔ ذرائع کے مطابق ڈی آئی خان ریجن سے ایک بڑا قافلہ عمر امین کی قیادت میں صوابی پہنچے گا، جو جلسے میں بھرپور شرکت کرے گا اور پارٹی کے احتجاجی مظاہروں کو مزید تقویت دے گا۔

اس حوالے سے خیبرپختونخوا کے وزیراعلیٰ کے ترجمان فراز مغل نے جیو نیوز سے بات کرتے ہوئے تصدیق کی کہ علی امین گنڈاپور نے تمام اخراجات اپنی جیب سے ادا کیے ہیں۔ ان کا کہنا تھا کہ وزیراعلیٰ پارٹی کے ساتھ مخلص ہیں اور پارٹی کے استحکام کے لیے ہر ممکن مدد فراہم کر رہے ہیں۔ انہوں نے مزید کہا کہ علی امین گنڈاپور نے کل ہونے والے جلسے کے لیے بھی فنڈ فراہم کیا ہے، اور وہ آئندہ بھی پارٹی کے لیے کام کرتے رہیں گے۔

ترجمان کے مطابق وزیراعلیٰ خیبرپختونخوا کا مؤقف ہے کہ پارٹی کو کسی مالی مشکلات کا سامنا نہ ہو، اسی لیے وہ ذاتی وسائل سے جلسے اور احتجاجی سرگرمیوں کی مالی معاونت کر رہے ہیں۔https://twincitynews.pk/pti-swabi-jalsa-protest-8feb/