میانوالی کے محمد مامون خان نے انگلینڈ کی نوکری چھوڑ کر سی ایس ایس پاس کیا، پولیس سروس آف پاکستان (PSP) میں تقرری

اسلام آباد (عثمان پراچہ سے):

میانوالی سے تعلق رکھنے والے اور لاہور میں مقیم محمد مامون خان نے فیڈرل پبلک سروس کمیشن کے تحت ہونے والے سینٹرل سپیریئر سروسز (CSS) امتحان میں نمایاں کامیابی حاصل کرنے کے بعد پولیس سروس آف پاکستان (PSP) میں تقرری حاصل کر لی ہے۔

قابلِ ذکر بات یہ ہے کہ محمد مامون خان اس وقت برطانیہ میں People Services and Finance Lead کے طور پر کام کر رہے تھے، جہاں وہ مینجمنٹ اور فنانس کے شعبے سے وابستہ تھے۔ انہوں نے اپنی مستحکم نوکری چھوڑ کر پاکستان واپس آنے اور سول سروس جوائن کرنے کا فیصلہ کیا تاکہ ملک و قوم کی خدمت کر سکیں۔

مامون خان کا شمار ان نوجوانوں میں ہوتا ہے جنہوں نے محدود وسائل کے باوجود محنت، لگن اور عزم کے ساتھ نمایاں کامیابی حاصل کی۔ وہ نیم سرکاری تعلیمی پس منظر سے تعلق رکھتے ہیں اور تعلیم کے دوران مالی مشکلات کا سامنا کرتے رہے۔

ان کے پاس چارٹرڈ فنانشل اینالسٹ (CFA) کی سند موجود ہے جبکہ وہ اس وقت یونیورسٹی آف لندن سے ایم بی اے بھی کر رہے ہیں۔ مامون کے مطابق، سی ایس ایس کا سفر نہ صرف ایک علمی امتحان تھا بلکہ ایک ایسا تجربہ بھی جس نے ان کی شخصیت اور سوچ کو نکھارا۔

انہوں نے کہا کہ

سی ایس ایس صرف علم کا امتحان نہیں بلکہ برداشت، عزم اور عملی فیصلوں کا امتحان بھی ہے۔ یہ نوجوانوں کو ملک و قوم کی خدمت کے بے شمار مواقع فراہم کرتا ہے، اور پولیس سروس عوام کو براہِ راست انصاف دینے کا بہترین پلیٹ فارم ہے۔

میانوالی کے ایک عام تعلیمی پس منظر سے لے کر پاکستان کی اعلیٰ سول سروس میں جگہ بنانے تک مامون خان کا یہ سفر ثابت کرتا ہے کہ محنت اور خوداعتمادی سے کوئی بھی رکاوٹ عبور کی جا سکتی ہے۔
ان کی کامیابی اُن نوجوانوں کے لیے ایک حوصلہ افزا مثال ہے جو بیرونِ ملک کامیاب کیریئر چھوڑ کر اپنے ملک کی خدمت کا جذبہ رکھتے ہیں