ریاض سے کراچی – پی آئی اے نے فلائٹ آپریشنز کی بحالی کا اعلان کر دیا

ریاض: پاکستان انٹرنیشنل ایئر لائن (پی آئی اے) نے نئے سال کے موقع پر سعودی عرب میں مقیم پاکستانیوں کے لیے خوشخبری سنا دی۔ قومی ایئر لائن نے اعلان کیا ہے کہ ریاض سے کراچی کے لیے فلائٹ آپریشنز کا باضابطہ آغاز کیا جا رہا ہے، جو طویل عرصے سے مسافروں کا بڑا مطالبہ تھا۔

پی آئی اے حکام کے مطابق نئی پروازوں کے آغاز سے سعودی عرب اور پاکستان کے درمیان سفری سہولتوں میں نمایاں اضافہ ہوگا۔ ریاض میں مقیم پاکستانی کمیونٹی نے اس فیصلے کا خیر مقدم کرتے ہوئے اسے نئے سال کا حقیقی تحفہ قرار دیا ہے۔

ایئر لائن کے مطابق ریاض تا کراچی پروازیں باقاعدہ شیڈول کے تحت چلائی جائیں گی، جس سے نہ صرف کاروباری طبقے اور مزدور پیشہ پاکستانیوں کو فائدہ ہوگا بلکہ خاندانوں کو بھی براہِ راست سفری سہولت میسر آئے گی۔

پی آئی اے نے یقین دہانی کرائی ہے کہ مسافروں کو بہتر سروس، آرام دہ سفر اور مناسب کرایوں کی فراہمی یقینی بنائی جائے گی۔

ریاض اور کراچی کے درمیان نئے فلائٹ آپریشنز کی بحالی سے دونوں ممالک کے درمیان روابط مزید مضبوط ہوں گے اور سفری دباؤ میں بھی کمی آئے گی۔