مجلس پاکستان الریاض کے زیر اہتمام سیرت النبی ﷺ کانفرنس کا انعقاد

الریاض (حمزہ عباس) – مجلس پاکستان کے زیر اہتمام سیرت النبی ﷺ کانفرنس کا انعقاد کیا گیا جس میں مختلف سیاسی و سماجی رہنماؤں اور کمیونٹی کی سرکردہ شخصیات نے شرکت کی۔

کانفرنس کی صدارت رانا عبدالرؤف نے کی جبکہ ڈاکٹر زاہد ملک مہمانِ خصوصی تھے۔ نظامت کے فرائض نسیم پاشا نے انجام دیے۔ جنرل سیکریٹری رانا عمر فاروق، صدر یوتھ فورم ابراہیم جٹ، سینئر نائب صدر ن لیگ ریاض خالد اکرم رانا، قاضی اسحاق میمن، صدر پیپلز پارٹی ریاض ریجن احسن عباسی اور امیر مرکزی جمعیت اہل حدیث ریاض ڈاکٹر اویس سلفی نے بھی خطاب کیا۔

ڈاکٹر زاہد ملک نے اپنے خطاب میں "داعیِ اعظم ﷺ” کے موضوع پر روشنی ڈالتے ہوئے کہا کہ حضور اکرم ﷺ کی سیرت انسانیت کے لیے مشعلِ راہ ہے اور آج کے دور میں ان کی تعلیمات پر عمل پیرا ہونا ہی کامیابی کا ذریعہ ہے۔

مقررین نے کہا کہ سیرت النبی ﷺ ہمیں اتحاد، ایثار اور خدمتِ خلق کا درس دیتی ہے اور سعودی عرب میں مقیم پاکستانی کمیونٹی کو چاہیے کہ ان سنہری اصولوں کو اپنی عملی زندگی میں اپنائے۔