آئی سی سی نے ٹیسٹ رینکنگ جاری کردی

بھارت اور ویسٹ انڈیز کے مابین ٹیسٹ میچ کے اختتام پر آئی سی سی نے تازہ ترین ٹیسٹ رینکنگ جاری کی ہے۔

نئی ٹیسٹ رینکنگ  کے مطابق ویسٹ انڈیز کے خلاف ٹیسٹ میچ میں شاندار سنچری سکور کرنے والے روہت شرما نے ٹاپ ٹین میں واپسی کی ہے اور اس وقت وہ ٹاپ ٹین میں شامل واحد بھارتی بیٹر ہیں۔

دوسری جانب بھارت کے آف سپنر روی چندرن ایشون ٹیسٹ بائولرز رینکنگ میں پہلی پوزیشن پر موجود ہیں جبکہ آل رائونڈر رویندرا جدیجا نے ویسٹ انڈیز کے خلاف میچ میں پانچ وکٹیں حاصل کرکے اپنی ٹیسٹ رینکنگ میں بہتری کی۔

وہ تین درجہ ترقی کے بعد ساتویں پوزیشن پر آگئے ہیں جبکہ آل رائونڈرز رینکنگ میں وہ پہلے نمبر پر برقرار ہیں۔ ٹیسٹ بیٹرز رینکنگ میں کین ولیمسن پہلی پوزیشن پر برقرار ہیں۔

آسٹریلیا کے ٹریوس ہیڈ دوسری اور پاکستانی ٹیم کے کپتان بابراعظم تیسری پوزیشن پر برقرار ہیں۔

بائولرز میں آسٹریلوی کپتان پیٹ کمنز دوسری اور جنوبی افریقہ کے کگیسو ربادا تیسری پوزیشن پر برقرار ہیں۔